Hvað gerðist í bikarúrslitaleiknum sem neyddi þig af velli? Var það ekki ferlega fúlt eftir gott gengi í sumar?
Ég lenti í samstuði við einn Skagamanninn og fékk heilahristing, jú það var ferlega fúlt.

Hvað fannst þér um hrakspár „knattspyrnuspekinga fyrir mót?
Við vorum búnir að standa okkur illa á undirbúningstímabilinu og þessi spá kom í kjölfarið.

Hvernig finnst þér sumarið hafa gengið hjá FH?
Sumarið gekk vel og allir FH-ingar geta verið stoltir og borið höfuðið hátt þrátt fyrir tapið í bikarnum.

Hvað með eigið gengi?
Ég er sáttur með mína frammistöðu í sumar.

Getur þú nefnt einhverja hápunkta eða eftirminnilegasta leik?
Hápunkturinn var að spila stærsta leik sumarsins og upplifa stemmninguna sem er í kringum bikarúrslitaleikinn. KR leikurinn þar sem við unnum 3-2 eftir að hafa verið 2-0 undir var góður og svo fannst mér Valsleikurinn á Hlíðarenda mjög skemmtilegur.

Hvað með vonbrigði sumarsins?
Bikarúrslitaleikurinn var vonbrigði sumarsins.

Lánssamningurinn við FH rennur út um áramót. Hvernig meturðu möguleikana hjá Molde?
Það er bara að bíða og sjá.

Munu þjálfaraskiptin hjá Molde breyta einhverju fyrir þig?
Það á eftir að koma í ljós en ég vona það.

Hvernig hefur vistin verið í Noregi?
Vistin hefur verið ágæt en þetta er bara púl og æfingar.

Hvað gerirðu þegar þú ert ekki að spila fótbolta?
Þá tek ég því rólega og rækta böndin við vini og vandamenn.

Getum við átt von á því að sjá þig í svart hvítu næsta sumar?
Það er aldrei að vita.

Nú varstu valinn í lið 13-18 umferðar sem hlýtur að vera gríðarleg viðurkenning, ertu ekkert súr yfir að Óli Þórðar hafi ekki séð not fyrir þig í U-21 árs liðinu?
Ég setti mér það markmið fyrir tímabilið að vera fastamaður í liði FH og komast í þetta U-21 árs lið.

Hvaða sóknarmaður hefur valdið þér mestum vandræðum í sumar?
Logi Geirsson kemur mér alltaf sífellt á óvart. Hann er einnig lúnkinn á milli stanganna.

Áttu þér einhverjar fyrirmyndir í boltanum?
Nei.

Einhver hjátrú fyrir leiki hjá þér?
Já ég spila alltaf í sömu nærbuxum og sama bolnum, síðan drekk ég alltaf teið frá mömmu fyrir leik.

Uppáhaldslið í útlöndum?
Glory glory Man United.