Þetta er upphitun fyrir leik FH og Þróttar á Valbjarnarvelli sem fram fer á mánudaginn næsta, 31. ágúst. Leikurinn hefst kl. 18:00. Ljóst er að mikið verður í húfi þar sem að Þróttur verður að vinna leikinn til að eiga séns á að halda sér uppi í Pepsi-deildinni.

Þróttur
Köttarar sitja í 12. og neðsta sæti eftir 18 umferðir með aðeins 11 stig. Þeir hafa skorað 20 mörk en fengið á sig 44 talsins. Sigrar liðsins eru 3, jafnteflin eru tvö og töpin eru 13.

Síðasti leikur Þróttara var gegn ÍBV í Eyjum síðastliðinn sunnudag. Þar töpuðu þeir 1-0 í miklum rokleik sem að var eign Eyjapeyja frá A til Ö, en þeir náðu þó ekki að skora fleiri mörk en til þurfti.

Síðasti sigur Þróttara kom gegn Fjölnismönnum 5. ágúst síðastliðinn, á afmælisdegi félagsins. Í þeim leik sýndu þeir merki þess efnis að þeir gætu, á góðum degi, spilað virkilega flottan fótbolta. Þó er varla hægt að efast um vægi brottvísana tveggja Fjölnismanna í þeim leik.

Fyrri leikir liðanna á Valbjarnarvelli/Laugardalsvelli

Síðasti leikur liðanna á heimavelli Þróttar, Valbjarnarvelli, fór fram þann 19. maí 2008. Sá leikur var eftirminnilegur á margan hátt, endaði hann 4-4 en Þróttarar náðu að jafna leikinn einungis tveimur mínútum fyrir leikslok.

14.9.2003 Þróttur 0 – 3 FH Efsta deild (Símadeildin)
15.8.2005 Þróttur 1 – 5 FH Efsta deild (Landsbankadeildin)
19.5.2008 Þróttur 4 – 4 FH Efsta deild (Landsbankadeildin)

FH
FH-ingar sitja á toppi töflunnar með 43 stig. Við höfum skorað 49 mörk en fengið á okkur 20. Sigurleikir liðsins eru 14, eitt jafntefli hefur verið gert og töp liðsins eru þrjú.

FH-liðið kemur hálf vængbrotið til leiks. Liðið tapaði 0-3 fyrir sprækum Grindvíkingum í Kaplakrika um síðustu helgi, úrslit sem að voru vægast sagt óvænt. Þá er ljóst að Dennis Siim verður ekki með liðinu vegna meiðsla. Það er þó ljóst að Atli Guðnason, Björn Daníel og Tryggvi Guðmundsson snúa aftur eftir meiðsli.